Buchsisamschti i voune züüg

Am 19.10.2024 isches äntlech so wyt gsii, dr 1. Buchsisamschti isch vor dr Tür gstande.

Scho dr ganz Tag si ganz vili Matche vo de verschidene Teams gloffe, am 17:00 Uhr wäre eigentlech mir dranne gsii aber mir hei mitere chline Verspätig müesse starte. Vorem Start heimer natürlech no es Föteli mit em STV Oensingen u em Schiri gmacht da d Week of the Referee isch. Nomau es riiise Danke a aui Schiri's für öie Ihsatz und Engagement!!!

När simer de mau i 1. Satz gstartet. Dä isch vo üsere Site mega guet gloffe. Mit starche Service u enschlosseheit im Ahgriff heimer Punkt um Punkt gmacht. Mir hei viu gfiiret u üs gfröit. Dä Satz heimer souverän 25:15 gwunne.

Natürlech heimer o i 2. Satz mit dere Energie wöuä starte. Am Ahfang isch üs ds glunge doch mit dr Zyt hei sech immer meh Eigefähler bi üs ihgschliche. Dr Service het nümme ganz so klappt u es het o viu längi Bauwächsle gä womer zum teu leider hei müsse a STV Oensinge abgää. Troz däm auem heimer dä Satz knapp mit 27:25 chönne gwinne.

"So jetzt näme mer dä 3. Satz no", schön wärs gsii wes würklech so wär gloffe wimer üs ds erwünscht hei. Mir hei ni guet gstartet u üsi Ahnahm isch mega unsicher gsii. Wemer dr Bau hei kha heimer dr Fähler im Ahgriff gmacht oder üse gägner het schön chönne Ufboue u punkte. Leider het sech das chli düre ganz Satz zoge... mir si zwar wider chli dricho aber es het doch ni glängt. Mir hei dä Satz 14:25 müesse abgä.

Nachem nid so gungnige 3. Satz het üs das rächt abezoge. Mir hei nümme so starch Serviert, üsi Ahgriffe si weniger muetig worde u o d Eigefühlerquote isch wider ehner höch gsii. Gägä Schluss het aues wider ä chli besser klappet. Glich het Oensinge dä Satz knapp mit 22:25 chönne gwinne.

So jetzt het sech dä Buchsisamschti wenigstens glohnt u d Zueschouer bechöme no chli öpis z gsee. Mitem Schwung womer im 4. Satz gägä Schluss hei becho simer gad gstartet. Dr letzt Satz isch wider ufem Niveau vom 1. Satz gsii, mit hei wider besser Serviert, si muetiger im Ahgriff gsii u hei jede Punkt wider meh gfiiret. Mit dere Power heimer dr 5. Satz 15:9 gwunne u somit üses 2. Saisonspiel 3:2 für üs entschide.

Fazit vo däm Match isch: Dr Ahnfang u dr Schluss isch super gsiii ! 😄

Für üs geits am Sunnti dr 27.10.2024 wyter z Gränche. Mir fröie üs über aui wo üs chöme cho ungerstütze!

"Tipkick"

VBC Münchenbuchsee - STV Oensingen (25:15, 27:25, 14:25, 22:25, 15:9)