VBC Thun vs. VBC Münchenbuchsee – Saisonabschluss und Saisonhighlight?

Am Sunnti si mir für üses letzte Spiel vor Meisterschaft nach Thun greist. Es Spiel ohni viu Druck – dr dritt Platz ir Tabelle heimer scho uf sicher gha – aber trotzdem simer mitem Wunsch atrette, zum Abschluss nomau es guets Spiel z zeige. Thun isch insgesamt e chli besser i Match gstartet. Mir hei zwar okay gspielt, aber wi no hüüfig ir letste Ziit hett di letsti Konsequenz gfählt. So verlüre mir dr erst Satz schlussendlich mit 25:22. Im zwöite Satz chöme mir besser iz Spiel und bechöme d Agriffe vo de Thuner chli besser i Griff. Glichziitig chöi mir üses Niveau bhaute und hole so üse erst Satz mit 25:20. 
Dr dritt Satz chöi mir ähnlich dütlich mit 25:17 für üs entscheide. Mir spiele witerhin solid und chöi d Thuner mit dr einte oder andere Serviceserie unter Druck setzte. 
Im vierte Satz heimer üs fest vorgno, dr Sack zue z mache und mit 3 Pünkt ir Tabelle immerhin noch punktemässig glichzzieh mit de zwöitplatzierte Langethaler. Insgesamt heimer aber wider meh müeh gha im vierte Satz. D Thuner hei guet blocket und verteidiget und obwohl mir lang guet im Satz si gsi, hei si gege Satzendi chönne dervozieh. Mir chöme zwar nomau häre, verlüre aber dr viert Satz mit 26:24. 
Im füfte Satz heimer ner schnell wider zu üsem Spiel zrügg gfunde und de dr Sack glich no zueta. Mir gwinne dr letst Satz vor Meisterschaft mit 15:11 und fröie üs über e glungni Saison und e guete dritte Platz. 
Obwohl mir solid hei spielt, isch dä Match nid üses Saisonhighlight gsi. Das macht aber o gar nüt, wöu schliesslich steit no dr Final vom Berner Kantonalcup vor der Türe. Und es besser Highlight als es Finalspiel zum Abschluss gitts sowiso nid. 😉