Aller guten Dinge sind Drei

Mä seit so schön "Aller guten Dinge sind Drei", drum hole mir i üsem dritte Saisonspiel ou drü Punkt gäge altbekannti Gägnerinne vo Satus Köniz!

Am 2. Buchsisamsti vor Saison si mir am 13:00 Uhr gäge Satus Köniz i üses dritte Spiel vor Saison gstartet. D'Gägnerinne si üs vo de letzte Saisons bekannt, einigi Spielerinne vo Satus si sogar mau Teil vo üsem Team gsi. Bis jetzt hei mir gäge Satus Köniz immer iihgluegt, das heimer ah däm Buchsisamsti wöue ändere und e Sieg gäg das Team hole!

Mitem Vorsatz, sowouh ufem aus ou näbem Fäud e super Stimmig härezbringe simer de pünktlech ih dä Match gstartet. Es isch am Afang chli es Knorz gsi, aber mir si ca. im Glichschritt mit de Gägnerinne zu Punkt cho - bis 5:6 für Gägnerinne gstande isch, när heimer churz e Toucher gha. Bi 5:10 het d'Dinah de z'erste Mau miteme Time-Out müesse ihgriffe, das het leider bedingt Würkig zeigt. Bim Stand vo 9:17 hets scho chli schlächt für üs usgseh, aber mir hei üs nid lah beirre und witerkämpft. Nachemne Powerwächsu bi 13:19 heimer ufdräiht. Üsi Nr. 6, Tsedi, het dr erst Satz heiserviert, ganzi 9 mau hetsi ar Grundlinie Position bezoge u mit ihrem Service mächtig Druck gmacht! Dank dr super Teamleistig heimer dä Satz 25:20 heigrettet! Das nennt me Stabilität und mentali Stärki, nice.

Im 2. Satz isch üs aues glunge und de Gägnerinne quasi nüd meh. Mir hei chönne befreit spiele, super Services liefere und eifach Fröid ufem und näbem Fäud ha. So fägts äbe! Dä Satz heimer ohni Problem 25:12 heibracht.

Allez, no ei Satz und mir hei die drü Punkt! Ih unveränderter Konstellation simer guet i dritt Satz gstartet - Satus hetsech wieder chli gfasst und beidi Teams hei immer wieder direkt usem Side-Out chönne punkte; keis Team hetsech chönne absetze, mir hei aber immer e liechte Vorsprung vo 1-2 Punkt gha. Bis zum Stand vo 19:17 für üs; plötzlech isch 19:22 gstande, d'Dinah nomau gwächslet. 20:22 füre Gägner, äs isch aber no nüd verlore. Mir blibe säubstsicher und muetig, getroue üs dr Punkt z'sueche. Am Schluss bringe mer ou dä Satz hei u gwinne das Spiel 3:0.

Äs het zeigt, dass mit guetem Servicedruck viu dinn liegt, jedi Spielerin het uf em Fäud aber ou uf dr Bank ihre Biitrag gleistet - so gwinnt me Spiel! Und die Mentalität womer hei zeigt, insbesondere im erste Satz, nähme mer gad mit is nöchste Spiel am Samsti, 9.11., gäge VBC Grosshöchstetten - d'Ufstigerinne us dr 3Lpro.

Eini für Aui, Aui für Eini - TEAM!

VBCM Münchenbuchsee vs. Volley Satus Köniz 3:0 (25:20, 25:12, 25:23)