Knapp d'Sätz verliere git leider ou keni Punkt

Motiviert heimer üs am Samsti, 20.01.2024, z Buchsi ir Haue troffe fürs Spiel gäge Oberdiessbach. Ir Vorrundi heimer z'Oberdiessbach chli Müeh gha mit - sicher d'Lutsterchi vor Oberdiessbach inkl. ohrebetäubende Trummele heis nid eifacher gmacht, aber ou d'Gägnerinne säuber mit de Service und clevere Ahgriffe in Kombination mit üsere Leistig het zure 1:3-Niederlag gfüehrt. Mir hei auso no e Rächnig offe gha und am Beste giengs doch uf heimischem Bode - heimer dänkt. 

Mir si super i erst Satz gstartet und hei tatsächlich mau nid dr Start ine Satz beziehigswiis ines Spiel verpasst. Gstartet wie d'Fürwehr heimer äuä ou gad üsi Gägnerinne überrascht - e 6-Punkte-Vorsprung kenne mer nid so guet, aber hei, mir nähmes. Mir hei witer punktet und Oberdiessbach d'Bäu um d'Ohre gschlage - womer de gäg die 20er-Punkte-Gränze si cho, heimer immer no es grosses Pöuschterli gha. 
Irgendwie hei de üsi Gägnerinne dr Rank gfunde und üs z'Läbe schwär gmacht, primär über ihri schnäue und herte Mitti-Ahgriffe: und plötzlech isch üse Vorsprung wäggschmulze und mir si mitem Rügge zur Wand gstande. Zum Schluss vom Satz si de no paar blödi Eigefähler drzue cho und de het sich Oberdiessbach dr Satz gschnappet - 24.26.

Kopf hoch, mir si guet gstartet und guter Stimmung dass mer im zwöite Satz eifach wieder glich loslege, aber de besser verwaute. Spoiler: leider het das gad nid klappt. Dr 2. Satz het für Oberdiessbach so gstartet wie dr 1. Satz für üs. Mir hei Müeh gha mitem höche Block vo de Gägnerinne und äm schnäue Spieu wosi ufs Fäud gleit hei. Plötzlech si mir 6 Punkt hingenacheghinkt und hei müesse reagiere. Mit verschiedene Inputs vo üsne Coaches Löru und Domi und ou Spielerinnewächsle heimer de versuecht, dä Vorsprung z minimiere. Und siehe da, mir chöi ou ufhole! Irgendwie het das Team ah däm Match ja nöii Qualitäte entdeckt (findet emu d'Redaktorin, aber villech isch ds ou chli e Goldfisch u vergisst haut Sache). Plötzlech simer wieder vou drbi gsi und hei d'Gägnerinne mächtig unger Druck bracht. Aber z'Dame2 hets nüm gschafft, ds letzte Bitzli Konsequenz ufs Fäud z bringe und dä Satz zu üsem Vorteil abzschliesse. Und so heimer ou dä Satz mitemne Eigefähler verlore, wieder 24:26. 

Iz aber, zwöi Mau so knapp d'Sätz z'verliere het üs motiviert und mir wei ja dr erst Heimsamsti vom Jahr mitemne Sieg und vorauem mit sehr wichtige Punkt im Abstiegskampf beände. 
Mä munklet, dass d'Gägnerinne scho vorem 3. Satz hei gseid, dass sie ke 4. Satz meh möge prestiere - mir hätte jedoch klar e 4. und 5. Satz wöue. Aber de Gägnerinne ihre Wunsch isch erhört worde und so isch dr dritt Satz relativ schnäu e klari Gschicht für Oberdiessbach worde. Mir hei überau chli Problem bekundet und si nüm is Spiel ine cho - witerhin het Oberdiessbach über d'Mitti ei Punkt nachem andere gschribe und mir si abgschosse worde. So heimer de dä Satz klar 16:25 verlore und entsprächend d'Haue mitere 0:3 Niederlag verlah. 

Am Mittwuch geids scho witer mitem Bärner Kantonalcup womer gäge VC Uettligen wärde spiele. Ou wennmer derd nid um wichtigi Punkt ir Meisterschaft spiele, wöimer natürlech es guets Spiel liefere und üses Säubstvertroue stärke. 

Eini für aui - aui für eini - TEAM

VBCM - Volley Oberdiessbach 0:3 (24:26, 24,26, 16:25)